PRESENTACIÓN DO LIBRO HERBAS DA NOITE E TALLER DE ILUSTRACIÓN CON PAULA LAGO

Unha das actividades que realizamos para conmemorar a Semana do libro foi a visita de Dores Pereira e Paula Lago para presentar o seu libro "As herbas da noite".

O primeiro que fixeron foi expoñernos algunhas das herbas que aparecen no seu libro e xogamos a adiviñar cal era a planta que amosaban. Como as estamos a traballar no PDI Fiandeiras, moitas das plantas eran coñecidas para o alumnado e incluso sabían as súas propiedades. 

Dores explicounos porque escribiu o libro, cada ano saía coa súa filla a observar e recoller herbas, dun ano para outro, sendo difícil para ela recordar os nomes, polo que decidiu deixar conta das herbas no libro, recompilando por escrito o seu nome. 

Logo pasamos á parte de ilustración. O alumnado foi mesturando as cores primarias para obter novas cores e elixindo cal quería para realizar a súa produción. Tras ter cada un o seu bote de cristal coa cor, Paula Lago mostrounos como realizar unha ilustración coa técnica do chorreo e os nenos e nenas observaron, para deseguido, facer a súa propia.

Moitísimas grazas ás dúas, foi un obradoiro marabilloso!

XORNADA DE CONVIVENCIA: DAMOS A BENVIDA Á PRIMAVERA

No CRA realizamos unha xornada de biblioteca na que nos xuntamos o alumnado das diferentes aulas para darlle a benvida á nova estación. 

Aproveitamos para introducir propostas relacionadas co PDI Fiandeiras introducindo técnicas que aprenderamos coa artista Vero Vicente para extraer o pigmento das plantas, flores, terras...Observamos as diferenzas de elementos cos das estacións anteriores, sendo estas cores moito máis vivas e variadas. 

Tamén contamos cun obradoiro de xogos sensoriais e calma, tentando ter eses momentos de sentir, de ser e de estar. Creamos xogos con herbas aromáticas para recoñecer por olores, formas, tocando… Ademais experimentamos con outros xogos, relaxámonos, e masaxeamos aos compañeiros e compañeiras que quixeron. 

Outro dos obradoiros propostos foi deixar a pegada das herbas de San Xoán en arxila. O alumnado experimentou coas masas, para finalmente darlle a forma desexada, coller herbas e imprimilas sobre a arxila. O resultado foi máxico.

Tamén realizamos un obradoiro de papel reciclado. Cortamos en anacos o papel para reciclar. Deixámolo en auga unha media hora. Pasamos o batedor para facer unha pasta. Elaboramos o papel. Ademais, coa pasta, flores secas e tamén recen cortadas -fento, fiuncho, xesta...- decoramos o papel colocado nos bastidores, e tamén engadimos pigmentos naturais. Experimentamos un proceso que nos pareceu moi divertido!

Outro dos obradoiros da xornada foi o de Bombas de sementes. Nel o alumnado mesturou substrato con arxila, e esparexeu sementes de falsa árnica, unha planta típica da zona con moita tradición, posto que é unha das plantas que se utiliza na realización das alfombras do Corpus. Posteriormente, o alumnado tiña como misión lanzar as bombas pola contorna.

8M. Día da Muller.

Este Curso, para conmemorar a data do 8M, desenvolvemos nas diferentes aulas diferentes actividades. Durante este tempo, coñecemos á artista Cindy Sherman artista e investigadora da construción da identidade a través do autorretrato.

A artista nas súas fotografías remarca a artificialidade e ambigüidade dos estereotipos de xénero facendo uso de máscaras, pelucas, disfraces... utilizándose a si mesma como vehículo para representar unha gran variedade de temas do mundo contemporáneo, como o papel da muller. 

Na súa serie “Retratos históricos”, Sherman personifica protagonistas masculinos de pinturas clásicas da historia da arte, chamando a atención sobre o papel subordinado da muller nas mesmas.

O obxectivo desta actividade foi que as nenas e nenos analizasen e debatiran sobre o rol que teñen homes e mulleres nas obras clásicas, para posteriormente deconstruír estes papeis facendo unha reintrepetación de ditas obras. Á par, o alumnado foi coñecendo a unha artista contemporánea e a un referente artístico feminino.

ACTIVIDADES LEVADAS A CABO:

• Presentar á artista ao alumnado: breve biografía e obras.

• Tendo en conta os retratos históricos que a artista realiza partindo de obras de arte clásicas, no que se pode denominar “apropiación da historia da arte”, presentar ao alumnado diferentes obras clásicas nas que as personaxes femininas e masculinas teñen un rol de xénero marcado e visible.

• Analizar o papel das diferentes persoas que aparecen nas pinturas clásicas: Que fan, porque o fan as personaxes, cal é o papel que xogan as mulleres e os homes, como son, que características teñen...

• Elixir varias obras e representalas mudando os roles, para realizar unha reinterpretación das obras.

Deixámosvos o resultado dalgunhas delas.

DÍA DE ROSALÍA

O 23 de febreiro foi o día de Rosalía de Castro. Como cada ano, no CRA A Picaraña, celebrámolo. Desta vez as familias e as crianzas, na honra da escritora, están liberando nos montes, prados, patios… algúns versos da súa magnífica obra que falan de plantas ou flores e que coñecemos ou coñeceremos no PDI “Fiandeiras”. Estes versos van en vasiños compostables con sementes de flores e plantas autóctonas que o alumnado plantou.

RECOMENDACIÓN LITERARIA: O COELLIÑO BRANCO

Traémosvos de novo por aquí un podcast para facervos unha recomendación literaria. Nesta ocasión trátase de "O coelliño branco". O alumnado do CRA A Picaraña quedou encantado con esta historia e agora quere que chegue a máis persoas.

Agardamos que o conto vos guste tanto como a nós!

 ESCOITAR PODCAST DO COELLIÑO BRANCO

RECOMENDACIÓNS DE NADAL

Como tódolos anos dende o Equipo de Biblioteca queremos achegarvos unhas recomendacións de libros, xogos e materiais para o tempo de Nadal.
Agardamos vos sexan de axuda. Felices festas!

RECOMENDACIÓNS LITERARIAS

Este curso, dende a biblioteca, partiu a idea de recomendarnos os nosos contos favoritos. Así, cada grupo de nenos e nenas, tras chegar a un acordo e escoller o seu conto preferido entre os lidos no curso, elaboran un podcast literario no que recomendan ao alumnado das outras aulas a obra escollida.

Velaquí a primeira recomendación: O gato lambón.  

Agardamos que quededes con ganas de ler o conto!

ESCOITAR PODCAST DO GATO LAMBÓN