FORMACIÓN DE USUARIAS E USUARIOS DA BIBLIOTECA

A formación de usuarias/os supón un básico a principio de curso para lograr que os nenos e nenas comprendan o espazo e a colocación dos recursos. Desta vez levamos a cabo un xogo tipo “Xincana” onde o alumnado, por equipos, debería atopar un libro segundo a cor do círculo que tiñan. Posteriormente, analizamos os libros que colleron para determinar se eran de información, literatura, música, arte... e así comprender o sistema de colocación.

Presentamos tamén os espazos da biblioteca e os seus recursos:

ESPAZO CREATIVO: tecedora, pintura no encerado transparente, arte e construción.

ESPAZO LECTOR: literatura e libros de información.

ESPAZO PARA AS FUNCIÓNS EXECUTIVAS (xogos).

ESPAZO TREBELLADAS: escornabot, retroproxector, pantalla, cubo de luz, croma...

 

SELECCIÓN DE RECURSOS PARA O SAMAÍN

Este ano, para festexar o Samaín do xeito máis terrorífico, na nosa biblio fixemos unha selección de contos que meten moito medo. Buscade un lugar ben quentiño e seguro e desfrutade da lectura!

Feliz Samaín!

Os contos seleccionados son:

"Las brujas de Ariete” de Bel Olid e Pep Montserrat. Editorial Combel.
“El banquete de los monstruos” de Emma Yarlett. Editorial Edelvives.
“A bruxa regañadentes” de Tina Meroto e Maurizio A. C. Quarello. Editorial OQO.
“Gustavo, el fantasma tímido” de Flavia Z. Drago. Editorial Edelvives.
“Cómo hacerse amigo de un fantasma” de Rebeca Green. Editorial Juventud.
"Os tres bandidos" de Tomi Ungerer. Editorial Kalandraka.
“Donde viven los monstruos”, de Maurice Sendak. Editorial Kalandraka.
“Monstruos en la oscuridad” de Kalle Güettler e Rakel Helmsdal. Editorial Sushi Books.
“O gran libro dos medos do rato pequeno” de Emily Gravett. Editorial Patas de peixe.
“A miña amiga a escuridade” de Ella Burfoot. Editorial Baía.
“Cando Martiño tivo ganas de mexar na noite de reis” de Chema Heras e Kiko da Silva. Editorial Kalandraka.
“Rizos de Ouro e os tres osos” de Olivier Douzou. Editorial Kalandraka.
“O Papón” de Pablo Albo & Maurizio A. C. Quarello. Editorial OQO.
“El tren de los monstruos” de Ignasi Valios i Buñuel. Editorial Anaya.

DÍA DAS BIBLIOTECAS

Esta semana festexamos o Día das Bibliotecas poñendo en marcha as mochilas viaxeiras e o préstamo semanal.

Este ano a mochila viaxeira leva algúns elementos relacionados co proxecto documental integrado “Fiandeiras” no que comezamos a traballar. Cada mochila leva unha prensa cunhas instruccións que farán partícipes a familias e alumnado nas nosas pesquisas e experimentacións. Ademais, vai literatura pero tamén libros sinxelos de información. Levan a maiores, unha listaxe de música do CRA de spotify e un xogo regrado.

O préstamos semanais tamén saíron con moita ilusión dos máis pequenos e pequenas!

Agardamos que se desfruten moito.

INAUGURACIÓN DA BIBLIOTECA (SEGUNDA PARTE)

Aproveitamos a inauguración da biblioteca do Día 6 de outubro para volver con todo o alumnado ata este espazo a festexar, a xuntarnos e a pasar tempo xuntas/os. Se ben a biblioteca xa fora inaugurada polo alumnado, estreando e gozando destas instalacións en pasadas ocasións, faltaba esa inauguración oficial que levabamos agardando, e que non foi fácil de levar a cabo pola nosas características. 

A mañá transcorreu mentres o alumnado participaba en diferentes propostas coidadosamente preparadas con recursos da biblioteca, escoitaban unha marabillosa contada de Anxo Moure (que nos trouxo a súa ciclobiblioteca!) e, merendaban e gozaban coa música de Brais das Hortas. Todo un éxito!

Deixámosvos unhas fotos para ilustrar o día que pasamos nas diferentes propostas.

Grazas a todas e todos!

INAUGURACIÓN DA NOSA BIBLIOTECA (PRIMEIRA PARTE)

O pasado venres día 6 de outubro festexamos a inauguración das instalacións da nosa biblioteca e da sede do CRA. 

Neste día tan importante para nós acompañáronnos, ademais das nosas familias e alumnado, representantes da Consellería de Educación en materia de innovación educativa, de Bibliotecas Escolares e do Concello de Ponteareas. 

Grazas a todas e todos por estar con nós e apoiar o noso traballo.

RECOMENDACIÓNS DE VERÁN

Chegou o verán e con el as merecidas vacacións para todo o noso alumnado.

Dende a biblioteca deixámosvos unhas recomendacións de contos e xogos para que desfrutedes moito do tempo en familia, dos días longos, das tardes a remollo e da vida tranquila.

Agardamos que vos gusten. Vémonos en nada. 💙

ALBORADA PARA CONMEMORAR O DÍA DAS LETRAS GALEGAS

Para conmemorar o Día das Letras Galegas desfrutamos dunha xornada moi especial na que o alumando das diferentes aulas do CRA se xuntou na Casa Cultural de Arcos, en Ponteareas, onde festexamos unha alborada polas letras galegas. 

Tivemos a oportunidade de participar en diferentes obradoiros:

Obradoiro de cociña: no que cociñamos unha torta de millo.

Obradoiro de música e baile tradicional galego.

Obradoiro de realización de alfombras florais. Realizamos unha alfombra do co deseño que imos a realizar no Corpus en Ponteareas. Xa nas semanas anteriores,  pequenas/os e familias empezaron a recoller elementos naturais, a clasificalos e a desfollar flores. Tentamos con este obradoiro que este sentir e facer vaia cobrando cada vez máis sentido, ademais de aproveitar para traballar a tradición da nosa zona.

Obradoiro de xogos tradicionais,  no que o alumnado correu, fixo equipo e tivo a oportunidade de crear lazos de amizade co alumnado das outras aulas.

Contada teatralizada da “Galiña azul” de Carlos Casares en honra a Editorial Galaxia e Francisco Fernández Del Riego.

Andaina á Pedra do equilibrio, no parque forestal A Picaraña, que da nome ao noso cole. Unha andaina preciosa chea de vexetación autóctona e que nos fixo conectar coa natureza, o canto dos paxaros, os carballos, os castiñeiros e esas penas tan impresionantes que nos deixaron abraiadas/os. Algúns pequenos/as decidiron representar con pedras máis pequenas o que acababan de ver.