Visita ao MARCO: Pechando o trimestre entre arte e contos

Para poñer o broche final ao trimestre, o venres realizamos unha saída ao MARCO, o Museo de Arte Contemporánea de Vigo, unha experiencia que nos permitiu achegarnos ao mundo da arte dun xeito diferente e moi enriquecedor.

Durante a visita, o alumnado puido descubrir algunhas das exposicións do museo, aprendendo a observar as obras, interpretalas e deixar voar a súa imaxinación a partir do que ían vendo. Foi unha oportunidade para achegarse á arte contemporánea desde a curiosidade e o diálogo.

A xornada completouse cun obradoiro de contos, creando historias e conectando a experiencia artística co mundo da imaxinación.

Unha saída moi especial coa que despedimos o trimestre aprendendo fóra da aula, compartindo vivencias e descubrindo que os museos tamén son espazos para contar e vivir historias.

Xornada de biblioteca: Construíndo refuxios na natureza

Esta proposta desenvolveuse tamén na biblioteca de Ganade, onde contamos coa colaboración dunha arquitecta, Mónica, nai dunha alumna do centro, que nos acompañou nun obradoiro creativo arredor da figura de Friedensreich Hundertwasser e do concepto da súa “terceira pel”, entendida como o espazo que habitamos e que tamén construímos.

A actividade comezou cunha breve explicación adaptada ao alumnado, na que se introduciu a importancia de respectar a natureza, empregar materiais orgánicos e crear espazos máis libres, creativos e persoais, seguindo a filosofía deste artista.

A continuación, pasouse á parte práctica, na que a arquitecta iniciou a construción dunha pequena cabana. Para comezar, colocou pedras como base, garantindo así a estabilidade da estrutura. Sobre elas situou tocóns de madeira, explicando ao alumnado como contribuían ao equilibrio do conxunto. Pouco a pouco, e coa participación activa dos nenos e nenas, foron engadíndose ramas longas que se apoiaban entre si, creando unha especie de armazón natural.

Finalmente, a cabana foi cuberta con teas, dándolle forma e converténdoa nun pequeno refuxio simbólico. Durante todo o proceso, o alumnado participou de maneira moi implicada, achegando ideas, colaborando na construción e experimentando coas posibilidades dos materiais, das formas e do equilibrio.

Esta actividade non só favoreceu a creatividade e o traballo cooperativo, senón que tamén permitiu afondar na conexión coa natureza e na comprensión dun xeito diferente de concibir os espazos que habitamos.

Xornada de biblioteca: Construíndo refuxios para animais

O alumnado participou nun obradoiro creativo centrado na elaboración de casiñas de animais, unha proposta na que primeiro puideron explorar diferentes exemplos que serviron de inspiración antes de poñerse mans á obra.

A continuación, empregando barro e distintos elementos naturais, cada nena e neno deu forma á súa propia casiña, deixando voar a imaxinación e establecendo unha conexión directa coa natureza a través da creación manual e sensorial.

Esta actividade enmárcase dentro do Proxecto Documental Integrado do centro, no que seguimos traballando a terceira pel de Friedensreich Hundertwasser, entendendo a contorna como unha parte esencial de nós mesmos e promovendo o respecto e o coidado do medio natural.

Experiencias como esta permiten ao alumnado aprender facendo, ao tempo que desenvolven a creatividade, a sensibilidade ambiental e o vínculo co seu entorno máis próximo.

Encontro de biblioteca: Descubrindo o proceso da la

No último encontro celebrado na biblioteca do centro, o alumnado participou nun interesante obradoiro arredor do proceso da la, no que puido descubrir todo o percorrido que realiza este material natural, desde que se obtén da ovella ata que chega a nós transformado en roupa.

Da man da experta Ruth Mosquera, que nos acompañou durante a xornada, os nenos e nenas tiveron a oportunidade de achegarse a este proceso dun xeito vivencial, podendo observar, tocar e experimentar con diferentes ferramentas tradicionais empregadas ao longo do tempo.

Esta proposta enmárcase dentro do noso Proxecto Documental Integrado “As pegadas da nosa pel”, inspirado na teoría das cinco peles de Friedensreich Hundertwasser. Nesta ocasión, continuamos afondando na segunda pel: a roupa, entendida como unha parte fundamental da nosa identidade e da nosa maneira de relacionarnos co mundo.

A través deste tipo de experiencias, seguimos apostando por unha aprendizaxe activa e significativa, na que o alumnado aprende facendo, experimentando e sentindo, favorecendo así unha comprensión máis profunda e duradeira dos contidos.

Mulleres que constrúen: Aprendendo igualdade desde a aula

Con motivo da conmemoración do 8 de marzo, Día Internacional da Muller, no centro desenvolvemos unha proposta educativa adaptada ao noso alumnado co obxectivo de visibilizar o papel das mulleres en distintos ámbitos profesionais e fomentar valores de igualdade desde as primeiras idades.

A actividade conectouse co noso PDI e coa idea das peles de Hundertwasser, centrándonos nesta ocasión na terceira pel: a casa, entendida como o espazo que habitamos e que forma parte da nosa identidade. A partir desta reflexión, o alumnado pensou sobre os lugares nos que vive e sobre como estes poden ser espazos de coidado, convivencia e creatividade.

Tamén coñecemos o traballo de algunhas mulleres arquitectas destacadas, como Zaha Hadid, Lina Bo Bardi, Carme Pinós ou Izaskun Chinchilla, achegando así referentes femininos nun ámbito no que historicamente tiveron menor visibilidade.

A través de propostas artísticas e creativas, o alumnado puido expresar ideas e emocións relacionadas coa súa contorna máis próxima, reflexionando ao mesmo tempo sobre a importancia da igualdade e do respecto.

Con actividades como esta seguimos traballando para educar na igualdade desde a infancia e contribuír á construción dunha sociedade máis xusta e respectuosa.

Rosalía tamén vive aquí: A poesía que habita nas nosas casas

Con motivo do 23 de febreiro, Día de Rosalía, no centro desenvolvemos a proposta “Rosalía tamén vive aquí”, unha actividade para achegar o alumnado á figura e á poesía de Rosalía de Castro desde unha perspectiva próxima e significativa.

Partimos da idea de que Rosalía “vive” nas casas galegas, nas palabras que dicimos e no xeito no que sentimos o mundo. Esta proposta conectouse co noso PDI inspirado nas cinco peles de Hundertwasser, centrándonos nesta ocasión na terceira pel: a casa, entendida como o espazo que nos acolle, nos protexe e no que se constrúe o sentimento de pertenza.

A través da escoita e lectura de versos sinxelos de Rosalía, o alumnado achegouse á súa poesía, compartindo emocións, palabras que lles gustaban e lembranzas ou imaxes que os poemas lles evocaban. Tamén relacionamos os versos con cores, sons, elementos da natureza e cos diferentes lugares onde “vive Rosalía”: no corazón, na casa, na paisaxe e na lingua.

Como peche da actividade, cada aula escolleu un verso ou pequeno poema que lle gustou especialmente. Con eles elaboramos o cartaz “Rosalía tamén vive aquí”, levando así a súa palabra ás aulas, aos fogares e tamén á biblioteca do centro.

Deste xeito seguimos facendo que a nosa lingua e a nosa literatura formen parte da vida cotiá do alumnado, mantendo viva a voz dunha das figuras máis importantes da cultura galega.

A segunda pel en festa: celebramos o Entroido

O pasado venres celebramos o Entroido no CRA A Picaraña, nunha xornada chea de cor, creatividade e moita diversión.

Este ano quixemos contextualizar esta tradición a través do noso Proxecto Documental Integrado “As pegadas da nosa pel”, inspirado na teoría das cinco peles de Hundertwasser, que describe as capas que conectan ao ser humano co mundo: a pel, a roupa, a casa, a contorna social e o planeta.

Nesta ocasión centrámonos especialmente na segunda pel: a roupa, entendéndoa como unha forma de expresión persoal e tamén como parte da nosa identidade social. Por iso, tomamos como referencia a bata tradicional galega, un elemento moi presente na nosa cultura.

O alumnado puido dar renda solta á súa imaxinación customizando as súas batas, ademais de peitearse ou maquillarse, convertendo o corpo e a roupa nun espazo creativo no que expresarse libremente.

Para rematar a xornada tivemos unha convidada moi especial, Uxía Morán, que nos agasallou con varias contadas para grandes e pequenos, poñendo o broche final a un día cheo de alegría e tradición.